සිල්ලාහි ජින්දොක්

සිල්ලාහි ජින්දොක් රැජින (රාජ්‍ය සමය. 647-654) යනු කොරියාවේ තුන් රාජධානිවලින් එකක් වූ සිල්ලා රාජධානියේ විසූ රාජ්‍ය පාලනය කළ රැජිනියන් අතුරින් අයෙකි. ඇය විසින් 647 සිට 654 දක්වා සිල්ලාවේ රාජ්‍ය පාලනය මෙහෙයවන ලදී. ඇය සිල්ලා රාජධානියේ 28වන රාජ්‍ය පාලකයා වූ අතර එම රාජ්‍යයේ විසූ දෙවන රාජ්‍ය කරන රැජිනිය ද විය. ඇයට පෙර රාජ්‍ය විචාළ ඇගේ පූර්වප්‍රාප්තික සොන්දොක් රැජින එරට පළමු රාජ්‍ය කරන රැජිනිය වූවා ය. ඇගේ රාජ්‍ය සමයේ සිල්ලා රාජ්‍යය චීන ටෑං රාජ මාලිගය හා මිත්‍රව අසල්වැසි බෙක්ජේ රාජ්‍යය සමග ගැටුම් ඇතිකරගත්තේ ය. එසේම ටෑංහි ගඔෂොං අධිරාජයා වෙත කවියක් ලිවීම සම්බන්ධයෙන් ඇය ප්‍රසිද්ධියට පත් වූවා ය.

සිල්ලාහි ජින්දොක්
දකුණු කොරියාවේ, ග්යොංසංබුක්-දෝහි, ග්යොංජු පෙදෙසේ පිහිටි සිල්ලාහි ජින්දොක් රැජිනගේ රාජකීය සොහොන
කොරියානු නම
හංගුල්	진덕여왕
හන්ජා	眞德女王
ප්‍රතිශෝධිත රෝමානුකරණය	ජින්දොක් යෝවං
මැකූන්–‍රයිෂවර්	චින්දෝක් යෝවං

කොරියාවේ රජවරු සිල්ලා (එක්සත් කිරීමට පෙර)

හ්යොක්ගොසේ ක්‍රි.පූ. 57 – ක්‍රි.ව. 4 නම්හේ 4–24 යුරි 24–57 තල්හේ 57–80 පාසා 80–112 ජිමා 112–134 ඉල්සොං 134–154 අදල්ලා 154–184 බොල්හ්යු 184–196 නේහේ 196–230 ජොබුන් 230–247 චොම්හේ 247–261 මිචු 262–284 යුර්යේ 284–298 ගිරිම් 298–310 හ්‍යුල්හේ 310–356 නේමුල් 356–402 සිල්සොං 402–417 නුල්ජි 417–458 ජබි 458–479 සෝජි 479–500 ජිජ්‍යුං 500–514 බොප්හ්‍යුං 514–540 ජින්හ්‍යුං 540–576 ජින්ජි 576–579 ජින්ප්යොං 579–632 සොන්දොක් 632–647 ජින්දොක් 647–654 මුයොල් 654–661

රාජ්‍ය සමය

සොන්දොක් රැජිනගේ මරණින් පසු සිල්ලා රාජධානියේ සිහසුනට පත් ජින්දොක් රැජින සිල්ලාවේ දෙවන රාජ්‍ය කරන රැජිනිය වූවා ය. සිල්ලාවේ අනන්‍ය කුල ක්‍රමයේ ඉහළම කුලය වූ සොංගොල් කුලයේ අවසන් රාජ්‍ය පාලකයා වූයේ ද ඇයයි. ඇග් සැබෑ නාමය ස්‍යුංමන් යන්නයි. ඇගේ පියා වූ කිම් ගුක්බන්, ජින්ප්යොං රජුගේ බාලම සොහොයුරා වූ අතර, ඇගේ මව වොල්ම්යොං ආර්යාව නම් වූවා ය. ඇගේ සත් අවුරුදු රාජ්‍ය පාලන සමය තුළ, ජින්දොක් රැජින ප්‍රධාන වශයෙන්ම සිය අවධානය යොමුකළේ රාජ්‍යයේ විදේශ ප්‍රතිපත්තිය පිළිබඳවයි. කිම් යුෂින් නැමැති සෙන්පතියාගේ ආධාර ඇතිව ඇය සිල්ලා රාජ්‍යයේ ආරක්ෂාව ශක්තිමත් කිරීමට සමත් වූ අතර, ටෑං චීනය සමග ඇගේ රාජධානියේ සම්බන්ධතා ද වැඩි දියුණු කිරීමට උත්සාහ ගත්තා ය. මෙම උත්සාහයන් පසුකලෙක තුන් රාජධානි (සිල්ලා, බෙක්ජේ, සහ ගොගුර්යෝ) එක්සත් කිරීමට පදනම දැමූයේ යැයි කීම අසත්‍යයක් නොවේ.

මීට අමතරව ඇය විසින් පුම්ජු බදු එකතු කිරීමේ ක්‍රමය පුළුල් කරන ලදී.

ජින්දොක් රැජිනගේ සොහොන ග්යොංජු නගරයේ කඳු ගැටයක් මත පිහිටා ඇත. ඇතැම් ඉතිහාසඥයන් මෙම ස්ථානය සැබැවින්ම ජින්දොක් රැජිනගේ සොහොන වේ දැයි සැක පහළ කරති. සම්ගුක් සගි නැමැති ඓතිහාසික ග්‍රන්ථයේ සඳහන් වන්නේ ඇයව භූමදාන කෙරුණේ සර්යංබු නැමැති ස්ථානයේ බවයි. මෙම ස්ථානය ඉහත සොහොන පිහිටි ස්ථානයට විරුද්ධ පිහිටුමක පිහිටා ඇත.

උරුමය

887දී ජොංගං රජු මිය යමින් සිටින විට, රජු විසින් සිය සොහොයුරිය වූ සිල්ලාහි ජින්සොං රැජිනව සිය අනුප්‍රාප්තිකයා ලෙස නම් කළේ ය. මේ සඳහා සිල්ලාහි සොන්දොක් රැජින සහ ජින්දොක් රැජින වැනි රැජිනියන්ගේ සාර්ථක රාජ්‍ය සමයයන් පූර්වාදර්ශයක් වන්නට ඇත.

මේවාත් බලන්න

• කොරියාවේ ඉතිහාසය
• සිල්ලා
• සිල්ලාහි සොන්දොක් රැජින
• කොරියාවේ තුන් රාජධානි

මූලාශ්‍ර

• ලී, බේ-යොං (2008). Women in Korean History. එව්හා වුමන්ස් යුනිවර්සිටි ප්‍රෙස්.

සිල්ලාහි ජින්දොක් කිම් ගෘහය  මරණය: 654
රාජ පදවි නාමයන්
පූර්වප්‍රාප්තිකයා සොන්දොක්	සිල්ලාවේ රැජින 647–654	අනුප්‍රාප්තික මුයොල්