කන්ස්පිරසි ඉන් ද කෝට්
කන්ස්පිරසි ඉන් ද කෝට් (කොරියානු: 한성별곡; ප්‍රරෝ: හන්සොංබ්යොල්ගොක් ; සාහිත්‍යමය. සෝල්'හි ශෝක ගීතය) යනුවෙන් හැඳින්වෙන්නේ 2007දී විකාශය වූ දකුණු කොරියානු ඓතිහාසික රූපවාහිනී කතාමාලාවකි. මෙය විකාශය වූයේ KBS2 නාළිකාවෙනි. අභිරහස් ත්‍රාසජනක කතාමාලාවක් වන මෙමගින්, ජොසොන් රාජවංශයේ අවසාන දිනවල, එනම් ජාතිය කෙරෙහි බටහිර ආභාසය ශීඝ්‍රයෙන් වැඩි වූ සමයේ කොරියාවේ අගනුවර ලෙස පැවති හන්සොං නගරයේ සිදු වූ මිනීමරුමක් පිළිබඳ අභිරහසක් නිරූපණය වේ. නවක නළු නිළි පිරිසක් විසින් ප්‍රධාන චරිත නිරූපණය කරන මෙම කන්ස්පිරසි ඉන් ද කෝට් කතාමාලාව තුළින් මහජනයාගේ අයිතීන් සහ ආයතනික ප්‍රතිසංස්කරණ වෙනුවෙන් සටන් වැදි ජොසොන් රාජවංශයේ සුප්‍රකට 22වන රජු වූ ජොංජෝ රජුගේ සමයේ විසූ තරුණ චින්තකයින් සිව් දෙනකුගේ කථාව ගෙත්තම් වෙයි.[1] මෙම කතාමාලාව 6.00%ක (5.1% අවම - 7.5% උපරිම) තරම් පහළ සාමාන්‍ය ප්‍රේක්ෂක ප්‍රතිශතයක් හිමි කරගත්ත ද, එහි ඇති උසස් ගුණාත්මකභාවය සහ කලා අධ්‍යක්ෂණය වෙනුවෙන් එය විශේෂ පැසසුමට ලක් විය.[2][3][4]
| කන්ස්පිරසි ඉන් ද කෝට් | |
|---|---|
 ප්‍රවර්ධන පෝස්ටරයක් | |
| මෙලෙසද හැඳින්වේ | Seoul's Sad Song |
| රචනය කලේ | පාක් ජින්-වූ |
| අධ්‍යක්ෂණය කලේ | ක්වක් ජුං-හ්වන් |
| රඟපෑම | ජින් යි-හන් කිම් හා-ඉයුන් ලී චුන්-හී ආන් නේ-සං |
| සම්භව රට | දකුණු කොරියාව |
| කථාංග ගණන | 8 |
| නිෂ්පාදනය | |
| ධාවන කාලය | බදාදා සහ බ්‍රහස්පතින්දා 21:55ට (KST) |
| ප්‍රචාරණය | |
| මුල් නාලිකාව | KBS2 |
| මුල් ධාවනය | ජූලි 9, 2007 – ජූලි 31, 2007 |
| කාලානුක්‍රමය | |
| පූර්වගමනය වනුයේ | ෆ්ලවර්ස් ෆෝ මයි ලයිෆ් |
| අනුගමනය වනුයේ | අයි ඈම් සම් |
| බාහිර සබැඳි | |
| වෙබ් අඩවිය | |
කථා පුවත
සංස්කරණයබරපතල මිනීමැරුම් සිද්ධියක් විමර්ශනය කරන අතරතුර, රහස් පරීක්ෂක පාක් සං-ක්‍යු (ජින් යි-හන්) ජාවාරම්කරුවකු සතුව තිබී වල් බෙරි විශේෂයක් සොයා ගනියි. මේ සුවඳ රහිත, පැහැයක් නොමැති බෙරි විශේෂය එම මිනීමැරුම පසුපස ඇති අභිරහස විසඳීමට උපකාරී වේ යැයි ඔහු සැක කරයි. මේ අතර, ප්‍රධාන ව්‍යාපාරිකයකු වන යැං මන්-ඕ (ලී චුන්-හී) සිය බලය සහ ආධිත්‍යය පුළුල් කරගැනීමට සිතා සිය ප්‍රතිවාදියා වූ හොං ව නීති විරෝධී ක්‍රියාවන්හි යෙදෙන බවට විමර්ශන අංශය වෙත හසු කරයි. මන් මඳ කලකට වෙළඳපොල භූමියේ තිබූ තවත් මළ සිරුරක් හමු වීමෙන් පසු, හන්සොං නගරය නැවත වරක් බියෙන් ත්‍රස්ත වේ. පාක් රහස් පරීක්ෂක සැක කරන්නේ අපරාධකරුවා විසින් වල් බෙරි භාවිතා කර මෙම මිනීමැරුම් සිදු කරන බවයි. නමුත් ඔහු මෙම ගැටලුව විසඳීමට උත්සාහ දරන විට පෙනී යන්නේ මතුපිටින් පෙනෙනවාට වඩා වැඩි දෙයක් මේ සිදුවීම් තුළ ගැබ්ව ඇති බවයි.[1]
පසුකාලීන ජොසොන් රාජවංශ යුගයේ, දේශපාලන සහ සමාජයීය වශයෙන් අවුල් සහගත තත්ත්වයක පැවති කාලයේ මෙම කතාමාලාවේ ප්‍රධාන චරිත ත්‍රිත්වය "යහපත් දිවිය" යනු කුමක්දැයි මොනවට පෙන්වා දෙයි. මෙකල ප්‍රගතිශීලී චින්තන සහ කො‍න්ෆියුසියානු සමාජයීය ප්‍රතිසංස්කරණ ව්‍යාපාරය හෙවත් "සිල්හක්" ව්‍යාපාරය ක්විං රාජවංශයේ සිට ජොසොන් රාජ්‍යය වෙත ව්‍යාප්ත වේ. එසේම වසර 400ක් පමණ පැරණි ජොසොන් රාජවංශය ක්‍රම ක්‍රමයෙන් සිය භූමිය අහමි වීමේ තර්ජනයට ද මුහුණ පාමින් තිබෙන යුගයකි, මෙය. 16වන සියවසේ ඇති වූ ජපන් ආක්‍රමණ සහ මැංචු යුද්ධ හේතුවෙන් රාජ්‍යය බාහිර සහ අභ්‍යන්තර වෙනස්වීම් වලට මුහුණදීමට සූදනාම් නොවී ය. බලවත් ප්‍රතිසංස්කරණ ක්‍රියාත්මක කොට සිය අධිකාරී බලය ශක්තිමත් කොට, ආමූලික මට්ටමේ ජනතාවගේ ජීවන තත්ත්වය වැඩිදියුණු කිරීමටත් රජු අපේක්ෂා කළේ ය. නමුත් ගතානුගතික මතධාරී වංශවතුන්ගෙන් එය නිරතුරුවම බාධා එල්ල විය.[5]
චරිත
සංස්කරණය- පාක් සං-ක්‍යු: වංශවතකුට සහ සේවිකාවක උපන් පුත්‍රයකු වන සං-ක්‍යු සිය හදවත දැඩිව සංවෘතව තබා ගන්නේ සිය සැක සහිත සමාජ තත්ත්වය හේතුවෙන් ඇති වන අපවාද සහ වේදනාවන්ගෙන් දුරස් වීමටයි. ඔහුට ඇති එකම අස්වැසිල්ල ඔහු මුළු හදින්ම ප්‍රේම කරන ලී නා-යොං නැමැති කාන්තාවයි. ඔහු ඇගේ පවුලේ නිවසේ නිරතුරු ගැවසෙන අතර, එහිදී ඔහුට සිල්හක් පිළිබඳ දැනගන්නට ලැබෙයි. නා-යොංගේ නිර්දේශය මත ඔහු අධ්‍යයන කටයුතු සඳහා චීනය වෙත ගමන් කරයි. වසර සතරකට පසු ඔහු නැවත පැමිණෙන විට, කුමන්ත්‍රණ චෝදනා හේතුවෙන් නා-යොංගේ පවුල පිටුවහල් කොට ඇති බව දැනගන්නට ලැබෙයි. උසස් නිලයැති රාජ්‍ය තනතුරක් ලබාගෙන නා-යොංව සොයයාමට අදහස් කරන ඔහු, රාජ්‍ය සේවා විභාගයට අයදුම් කරයි. නමුත් බලාපොරොත්තු රහිත තත්ත්වයට පත්වන ඔහුට සිල්හක් පිළිබඳ කලකිරීමක් ඇති වේ.[5]
- ලී නා-යොං: ලී චම්-පන්ගේ එකම දියණියයි. නා-යොං සතුව ඉහළ අරමුණක් සහ ශක්තිමත් අපේක්ෂාවන් ඇත. සිය පියාගේ ප්‍රගතිශීලී චින්තනයට ස්තුතිවන්ත වන්නට ඇයට සිය පවුලේ සේවකයින්හට කියවන්නට උගන්වන්නට හැකි වේ. සමාජය යම් දිනෙක වෙනස් වන බව ඇය විශ්වාස කරයි. ඇය අවසානයේ සං-ක්‍යු සමග ප්‍රේමයෙන් බැ‍ඳෙයි. විශාල ධනවතකු සහ උසස් නිලධාරියකු වූ යැං මන්-හෝව ප්‍රතික්ෂේප කරන ඇය, සං-ක්‍යුහට චීණයට ගොස් ඉගෙනීමට දිරිමත් කරයි. ඔහුගේ බිරිඳ වීමට අදහස් කරන ඇය, ඔහු පැමිණෙන විට ඔහුගේ දරුවන්ගේ මව බවට පත් වේ. ඇගේ පියා කුමන්ත්‍රණ චෝදනාවකට හසු වීමත්, පිටුවහල් කිරීමෙන් පසු ඇගේ මව මියයාමත් හේතුවෙන් ඇගේ ජීවිතය ශෝකජනක එකක් බවට පත් වේ. තවත් වේදනා විඳ දරාගැනීමට අපොහොසත් වන ඇය, හ්වං ජිප්-සා සමග අගනුවර වෙත යයි. ඔහු ඇයට කටු චිකිත්සාව සහ ඖෂධ භාවිතය උගන්වයි. සිත දැඩි කරගන්නා නා-යොං සිය දෙමව්පියන්ගෙන් ඝාතකයන්ගෙන් පළිගන්නට අදහස් කරයි.[5]
- යැං මන්-ඕ: සිය පියා මෙන් වංශවතුන්ට හිස නැමීමට අකමැති වන මන්-ඕ, ලී චම්-පන්ගේ නිවසින් පිටව යන්නේ වංශවතුන්ටත් වඩා ඉහළ තත්ත්වයක් උදා කරගැනීමේ අපේක්ෂාවෙනි. සල්ජුග්යේ නැමැති කැරැලි කණ්ඩායම එකතු වන ඔහු, වංශවතුන් නෙරපා තමන් වැනි මිනිසුන්ට මඟ පාදා ගනියි. ඔහු මඳ කලකින්ම එහි නායකයා බවට පත්වන නමුත්, දැවැන්ත මැඬලීම් හමුවේ කණ්ඩායම වෙන් වී යයි. සිය ඉදිරි පියවර පිළිබඳ සිතා බැලීමට මන්-ඕ ලී චම්-පන්ගේ නිවසට යළි පැමිණෙයි. චම්-පන් මේන නොව ඔහුව උනුසුම්ව පිළිගන්නා නා-යොංගෙන් ප්‍රගතිශීලී චින්තනය ඉගෙනගන්නා ඔහු, බලය උපයා ගැනීමට ආයුධ අවශ්‍ය නොවන බවත්, ඒ සඳහා අවශ්‍ය ධනය බවත් වටහා ගනියි.[5]
දේශපාලනික අදාළත්වය
සංස්කරණයදේශපාලන තේමාවක් රැගත් මෙම රූපවාහිනී කතාමාලාව විකාශය ඇරඹුණේ 2007 ජනාධිපතිවරණ ව්‍යාපාරයේ උච්චස්ථානයේ දී ය. මේ හේතුවෙන් ප්‍රේක්ෂකයෝ මෙහි එන ජොංජෝ රජුගේ පරමාදර්ශී පාලන තන්ත්‍රය වත්මනට ගලපා ගන්නට උත්සාහ දැරූහ.[1][6]
චරිත නිරූපණය
සංස්කරණය- ජින් යි-හන්, පාක් සං-ක්‍යු ලෙස
- කිම් හා-ඉයුන්, ළී නා-යොං ලෙස
- ලී චුන්-හී, යැං මන්-ඕ ලෙස
- ආන් නේ-සං, ජොංජෝ රජු ලෙස
- ජුං ඒ-රි, මව් බිසව (දේබි) ලෙස
- දෝ ජි-වොන්, වොල්හ්යාං ලෙස
- කිම් ඉයුං-සූ, පාක් ඉන්-බින් ලෙස
- හන් ජුං-සූ, සියෝ ජූ-පිල් ලෙස
- පාක් සුන්-යොං, ජෝ ආර්යාව (සං-ගූං) ලෙස
- කිම් ගි-හ්‍යුන්, ෂිම් මින්-ගු ලෙස
- නම් ඉල්-වූ, චේ ස්‍යුං-හ්වන් ලෙස
- ජං හ්‍යුන්-සුං, ලී ජේ-හන් ලෙස
- කිම් මියුං-සූ, සේවක පාක් ලෙස
- ජොන් හ්‍යුන්, සේවා අමාත්‍ය ලෙස
- පාක් සු-හ්‍යුන්, චෝයි ඉල්-වූ ලෙස
- බේ සුං-වූ, කං දෝ-සුල් ලෙස
- ජෝ සුං-ඉල්, චෝ සං-චොන් ලෙස
- පාක් චුල්-මින්, අගනුවර විමර්ශන අංශයේ සෙන්පතියා ලෙස
- ලී මි-ජි, ඉයොම් ආර්යාව ලෙස
- ලී සොං, ලී චම්-පන් ලෙස; නා-යොංගේ පියා
- කිම් යොං-ඒ, හන් ආර්යාව (සං-ගූං) ලෙස
- සා හ්‍යුන්-ජින්, පාක් ආර්යාව (සං-ගූං) ලෙස
- කිම් ක්‍යුං-ර්යොං, හන් දෝ-හී ලෙස
- ජොන් ඉල්-බොම්, ෂින් සුං-දූ ලෙස
- ගෝ ඉන්-බොම්, කං ග්‍යුක්-සූ ලෙස
- කිම් මියුං-ගූක්, හොං හෙං-සූ ලෙස
- පාක් පල්-යොං, හොං මන්-කි ලෙස
- ලී දේ-රෝ, නෝ ගෙක්-ජූ ලෙස
- ජුං ජින්, කං ජේ-සූන් ලෙස
- ජුං ජින්-ගක්, චෝයි උයි-වොන් ලෙස
- කිම් හී-ර්යුං, නා-යොංගේ මව ලෙස
මූලාශ්‍ර
සංස්කරණය- ^ a b c "හන්සුංබ්යුල්ගොක් (AKA: සෝල්'ස් සෑඩ් සෝං) (DVD) (ඩිරෙක්ටර්'ස් කට්) (KBS ටීවී ඩ්‍රාමා) (කොරියා වර්ෂන්)". යස්ඒෂියා. සම්ප්‍රවේශය 2012-11-19.
- ^ "ටීවී රිවීව්ස්: 한성별곡-正 (කන්ස්පිරසි ඉන් ද කෝට්)". ට්විච් ෆිල්ම්. 29 අගෝස්තු 2008. සම්ප්‍රවේශය 2012-11-19.
- ^ "ට්විච් ටෝක්ස් විත් පීඩී ක්වක් ජුං-හ්වන් - පාට් 1". ට්විච් ෆිල්ම්. 29 අගෝස්තු 2008. සම්ප්‍රවේශය 2012-11-19.
- ^ "ට්විච් ටෝක්ස් විත් පීඩී ක්වක් ජුං-හ්වන් - පාට් 2". ට්විච් ෆිල්ම්. 29 අගෝස්තු 2008. සම්ප්‍රවේශය 2012-11-19.
- ^ a b c d "කන්ස්පිරසි ඉන් ද කෝට්". KBS ග්ලෝබල් මාකටිං. සම්ප්‍රවේශය 2012-11-19.
- ^ චුං, ආ-යොං (13 නොවැම්බර් 2007). "රිනයිසන්ස් ඔෆ් ජොසොන් කිං ජොංජෝ". ද කොරියා ටයිම්ස්. සම්ප්‍රවේශය 2013-04-02.
බාහිර සබැඳි
සංස්කරණය- කන්ස්පිරසි ඉන් ද කෝට් නිල KBS වෙබ්අඩවිය (කොරියානු)
- කන්ස්පිරසි ඉන් ද කෝට් සඳහා කොරියන් මූවී ඩේටාබේස්හි ඇති ගිණුම